ಕಲ್ಯಾಣಕರ್ನಾಟಕಅನುದಾನಹಂಚಿಕೆ: ಯಾದಗಿರಿಗೆಅನ್ಯಾಯ, ಪ್ರಶ್ನಿಸಲಾಗದರಾಜಕಾರಣ!

ಕಲ್ಯಾಣ ಕರ್ನಾಟಕ ಅನುದಾನ ಹಂಚಿಕೆ: ಯಾದಗಿರಿಗೆ ಅನ್ಯಾಯ, ಪ್ರಶ್ನಿಸಲಾಗದ ರಾಜಕಾರಣ!

– ಲಕ್ಷ್ಮೀಕಾಂತ ನಾಯಕ

ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿ (KKRDB) ಪ್ರಾದೇಶಿಕ ಅಸಮತೋಲನ ನಿವಾರಣೆಗೆ ಇರುವ ಪ್ರಮುಖ ಸಂಸ್ಥೆಯಾಗಿದ್ದರೂ, ಅದರ ಇತ್ತೀಚಿನ ಸಭಾ ನಡವಳಿಯೊಂದು ಯಾದಗಿರಿ ಜಿಲ್ಲೆಯ ಅಭಿವೃದ್ಧಿ ಆಶಯಗಳಿಗೆ ದೊಡ್ಡ ಪ್ರಶ್ನಾರ್ಥಕ ಚಿಹ್ನೆಯನ್ನು ಇಟ್ಟಿದೆ. ಕಾರ್ಯದರ್ಶಿಗಳು, ಕಲ್ಯಾಣ ಕರ್ನಾಟಕ ಪ್ರದೇಶ ಅಭಿವೃದ್ಧಿ ಮಂಡಳಿ, ಕಲಬುರಗಿ ರವರ ಸಭಾ ನಡವಳಿಗಳ ಪ್ರಕಾರ, ಒಂದು ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ:

2022-23ನೇ ಸಾಲಿನ ಯಾದಗಿರಿ ಜಿಲ್ಲೆಯ ಮ್ಯಾಕ್ರೋ ಯೋಜನೆಯಡಿಯಲ್ಲಿ ಒಟ್ಟು ರೂ 960.39 ಲಕ್ಷಗಳ (SCP-ರೂ 128.02 ಲಕ್ಷ, TSP-ರೂ 64.06 ಲಕ್ಷ, ಸಾಮಾನ್ಯ–ರೂ 768.31 ಲಕ್ಷಗಳು) ಅನುದಾನವನ್ನು ಶ್ರೀ ಜಯದೇವ ಹೃದ್ರೋಗ ಆಸ್ಪತ್ರೆಗೆ ಮಂಜೂರು ಮಾಡಲಾಗಿದೆ.

ಕಲಬುರಗಿಯಲ್ಲಿ ನಿರ್ಮಿಸಲಾಗಿರುವ ಈ ಆಸ್ಪತ್ರೆಯು ಒಟ್ಟು ಏಳು ಜಿಲ್ಲೆಗಳಿಗೆ ಅನುಕೂಲವಾಗುತ್ತದೆ ಎಂಬುದು ನಿಜ. ಆದರೆ ಇಲ್ಲಿ ಉದ್ಭವಿಸುವ ಪ್ರಶ್ನೆ ಸರಳವಾದದ್ದಲ್ಲ: ಬಡತನ ಮತ್ತು ಹಲವು ಮೂಲಭೂತ ಸಮಸ್ಯೆಗಳಿಂದ ನರಳುತ್ತಿರುವ ಯಾದಗಿರಿ ಜಿಲ್ಲೆಯ ಮ್ಯಾಕ್ರೋ ಯೋಜನೆಗೆ ಮೀಸಲಾದ ಬೃಹತ್ ಮೊತ್ತವನ್ನು ಕಲಬುರಗಿಯ ಕೇಂದ್ರ ಆಸ್ಪತ್ರೆಗೆ ವರ್ಗಾಯಿಸಲು ಕಾರಣವೇನು?

ಅಂದಾಜು ಮೊತ್ತಕ್ಕಿಂತ ಮೂರು ಪಟ್ಟು ಹೆಚ್ಚು ಹಣದ ಅಗತ್ಯವೇನು?

ಈ ಆತಂಕಕ್ಕೆ ಇನ್ನೊಂದು ಆಯಾಮವಿದೆ. ಲಭ್ಯ ಮಾಹಿತಿಯ ಪ್ರಕಾರ, ಜಯದೇವ ಹೃದ್ರೋಗ ಆಸ್ಪತ್ರೆಯ ಅನುಷ್ಠಾನದ ಒಟ್ಟು ಅಂದಾಜು ಮೊತ್ತ ಕೇವಲ ರೂ 282 ಲಕ್ಷಗಳು ಮಾತ್ರ. ಆದರೆ, ಅದಕ್ಕೆ ಯಾದಗಿರಿ ಜಿಲ್ಲೆಯಿಂದಲೇ ವಿವಿಧ ಉಪಯೋಜನೆಗಳಿಂದ ಸುಮಾರು 960.39 ಲಕ್ಷ ರೂ.ಗಳನ್ನು ಪಡೆಯಲಾಗಿದೆ! ಅಂದಾಜು ಮೊತ್ತಕ್ಕಿಂತ ಮೂರು ಪಟ್ಟು ಹೆಚ್ಚು ಹಣವನ್ನು ಏಕೆ ಮತ್ತು ಹೇಗೆ ಕೇವಲ ಒಂದು ಜಿಲ್ಲೆಯ ಯೋಜನೆಯಿಂದ ಪಡೆಯಲಾಯಿತು? ಉಳಿದ 700 ಲಕ್ಷ ರೂಪಾಯಿಗಳ ಬಳಕೆ ಏನು?

ಸಂದರ್ಭ ಗಮನಿಸಿದರೆ, ₹3000 ಕೋಟಿ ಅನುದಾನ ಘೋಷಿಸಿದ್ದ (2022-23ನೇ ಸಾಲಿನಲ್ಲಿ) ಬಿಜೆಪಿ ಸರ್ಕಾರ ಅಧಿಕಾರದಲ್ಲಿರುವಾಗಲೇ ದಿನಾಂಕ 19-03-2022ರಂದು ಈ ಕೆಕೆಆರ್‌ಡಿಬಿ ಸಭೆ ನಡೆದಿದ್ದು, ಕ್ರಿಯಾ ಯೋಜನೆಯನ್ನು ರಾಜ್ಯಪಾಲರಿಗೆ ಅನುಮೋದನೆಗೆ ಕಳುಹಿಸಲಾಗಿದೆ. ಆಡಳಿತಶಾಹಿ ಈ ನಿರ್ಧಾರಕ್ಕೆ ಅವಕಾಶ ನೀಡಲು ಯಾದಗಿರಿ ಜಿಲ್ಲೆಯ ಮೇಲೆ ಒತ್ತಡ ಹೇರಿದ್ದು ಸ್ಪಷ್ಟ.

ಪ್ರಶ್ನಿಸದ ನಾಯಕತ್ವ ಮತ್ತು ಜನರಿಗೆ ಅನ್ಯಾಯ

ಕೇಂದ್ರ ಸ್ಥಾನದಲ್ಲಿರುವ ಜಯದೇವ ಆಸ್ಪತ್ರೆಗೆ ಅನುದಾನದ ಅಗತ್ಯವಿತ್ತು ಎಂದಾದರೆ, ಅದನ್ನು ಏಳು ಜಿಲ್ಲೆಗಳ ಅನುಪಾತದಲ್ಲಿ ಅಥವಾ ಮಂಡಳಿಗೆ ಲಭ್ಯವಿದ್ದ ₹3000 ಕೋಟಿ ಒಟ್ಟಾರೆ ಅನುದಾನದಿಂದ ನೀಡಬಹುದಿತ್ತು. ಕೇವಲ ಯಾದಗಿರಿಯ ಬಡವರ ಯೋಜನೆಗಳ ಹಣವನ್ನೇ ಕಡಿತಗೊಳಿಸಿದ್ದು ಜಿಲ್ಲೆಯ ಜನರಿಗೆ ಮಾಡುವ ದೊಡ್ಡ ಅನ್ಯಾಯ.

ದುರದೃಷ್ಟವಶಾತ್, ಈ ನಿರ್ಧಾರಗಳ ಕುರಿತು ಜಿಲ್ಲೆಯನ್ನು ಪ್ರತಿನಿಧಿಸುವ ಶಾಸಕರು (ಗುರಮಿಟ್ಕಲ್‌ನಿಂದ ನಾಗನಗೌಡ ಕಂದಕೂರು, ಯಾದಗಿರಿಯಿಂದ ವೆಂಕಟರೆಡ್ಡಿ ಮುದ್ನಾಳ್, ಶಹಾಪುರದಿಂದ ಶರಣಬಸ್ಸಪ್ಪಗೌಡ ದರ್ಶನಾಪುರ, ಸುರಪುರದಿಂದ ರಾಜುಗೌಡ) ಮೌನ ವಹಿಸಿದ್ದಾರೆ. ಅಭಿವೃದ್ಧಿ ಮಂಡಳಿಯ ಈ ನಿರ್ಧಾರಗಳನ್ನು ಪ್ರಶ್ನಿಸದ ಇವರ ಮೌನವು ಜನರಲ್ಲಿ ಸಂಶಯ ಮೂಡಿಸಿದೆ. ಜನರ ಮೂಲಭೂತ ಸೌಲಭ್ಯಗಳಿಗೆ ಸಿಗಬೇಕಿದ್ದ ಅನುದಾನವು ಬೇರೆ ಕಡೆಗೆ ಹರಿದು ಹೋಗುತ್ತಿದ್ದರೂ, ಆಡಳಿತಾತ್ಮಕ ಮತ್ತು ಹಣಕಾಸು ನಿಯಮಗಳ ಉಲ್ಲಂಘನೆಯಾಗಿದ್ದರೂ ಈ ಜನಪ್ರತಿನಿಧಿಗಳು ಯಾಕೆ ಧ್ವನಿ ಎತ್ತುತ್ತಿಲ್ಲ? ಈ ವರ್ತನೆ ಜಿಲ್ಲೆಯ ಜನರನ್ನು “ನಾವು ಪ್ರಶ್ನಿಸಲಾಗದಷ್ಟು ಮೂರ್ಖರೇ?” ಎಂದು ಕೇಳುವಂತೆ ಮಾಡಿದೆ.

ಯಾದಗಿರಿಯ ಜನತೆಗೆ ಈ ಅನ್ಯಾಯದ ಬಗ್ಗೆ ಪ್ರಶ್ನಿಸುವ ಜವಾಬ್ದಾರಿ ಇದೆ. ಏಕೆಂದರೆ ಈ ರಾಜಕಾರಣಿಗಳು ಪ್ರಶ್ನಿಸುವುದಿಲ್ಲ. ಈ ಜಿಲ್ಲೆಯ ಸಂಪನ್ಮೂಲಗಳನ್ನು ಬೇರೆಡೆಗೆ ವರ್ಗಾಯಿಸುವ ಮೂಲಕ ಇಲ್ಲಿನ ಅಭಿವೃದ್ಧಿಗೆ ಕಲ್ಲು ಹಾಕಲಾಗುತ್ತಿದೆ. ಜನ ಜಾಗೃತರಾಗಿ ಈ ಅನುದಾನ ವರ್ಗಾವಣೆಯ ಅಧಿಕೃತ ಹಿನ್ನೆಲೆ ಮತ್ತು ಕಾರಣಗಳನ್ನು ಕೆಕೆಆರ್‌ಡಿಬಿ ಮತ್ತು ಸರ್ಕಾರದಿಂದ ಕೇಳಬೇಕಿದೆ.